Focal ó Phríomhfheidhmeannach an Acadaimh

Acadamh na hOllscolaíochta Gaeilge: Timpeallacht bhisiúil ardléinn, préamhaithe sa teanga agus sa dúchas.

 

Is é misean an Acadaimh pobal teanga agus léinn a chur chun cinn trí ollscolaíocht Ghaeilge den chéad scoth a chur ar fáil. Tá teacht anseo ar eolas faoi na cláir léinn a bhíonn á dtairiscint againn chomh maith le léargas ar thionscadail reatha taighde. Tá gach a ndéanann muid san Acadamh préamhaithe i dteanga agus dúchas na Gaeilge agus déantar saothrú ar leith ar réimsí léinn a imríonn tionchar tairbheach ar an bpobal teanga.

Dlúth-thréithe de chláir léinn uile an Acadaimh ná teagasc atá bunaithe ar thaighde, an machnamh criticiúil, scileanna anailíse, feasacht chultúrtha agus ardoiliúint teanga. Más mian leat cúrsa a dhéanamh linn cinnteoidh foireann teagaisc agus tacaíochta na gclár léinn go mbeidh scotheispéireas foghlama agat, i gceann ar bith de na hIonaid Ollscoile atá againn ar champas na Gaillimhe, Gaoth Dobhair, Carna nó ar an gCeathrú Rua.


Dónall Ó Braonáin, Príomhfheidhmeannach

TG4 Foghlaim

Tá TG4 i gcomhar le hOllscoil na hÉireann, Gaillimh tar éis suíomh nua físe a chur ar fáil ar www.tg4.ie/foghlaim do dhaltaí iar-bhunscoile atá ag ullmhú do Bhéaltriail Ghaeilge na hArdteistiméireachta. Is acmhainn nua oideachais closamhairc TG4 Foghlaim, atá curtha in oiriúint do riachtanais dhaltaí na hArdteistiméireachta, ach is féidir le foghlaimeoirí ar leibhéal ar bith an t-ábhar seo a úsáid lena gcuid scileanna Gaeilge a fhorbairt. Tá an acmhainn seo ar fáil saor in aisce do dhaltaí agus d’fhoghlaimeoirí eile in Éirinn agus ar fud an domhain.

Tá TG4 i gcomhar le hOllscoil na hÉireann, Gaillimh tar éis suíomh nua físe a chur ar fáil ar www.tg4.ie/foghlaim do dhaltaí iar-bhunscoile atá ag ullmhú do Bhéaltriail Ghaeilge na hArdteistiméireachta.

Is acmhainn nua oideachais closamhairc TG4 Foghlaim, atá curtha in oiriúint do riachtanais dhaltaí na hArdteistiméireachta, ach is féidir le foghlaimeoirí ar leibhéal ar bith an t-ábhar seo a úsáid lena gcuid scileanna Gaeilge a fhorbairt. Tá an acmhainn seo ar fáil saor in aisce do dhaltaí agus d’fhoghlaimeoirí eile in Éirinn agus ar fud an domhain.

Is furasta an suíomh gréasáin nua seo a úsáid agus beidh ábhar nua á chur ar fáil ann go leanúnach; ag tús gach seachtaine i rith na scoilbhliana, cuirfear cleachtaí nua in airde ann atá bunaithe ar mhíreanna físe ó scoth na gclár ar TG4. Tá na ceachtanna féin bunaithe ar thopaicí an tSiollabais Ardteistiméireachta agus ar fáil saor in aisce.

Is comhpháirtíocht idir TG4 agus Ollscoil na hÉireann, Gaillimh an togra seo agus táthar ag súil go rachaidh sé chun tairbhe do dhaltaí agus do mhúinteoirí araon.

Tuilleadh Eolais: caroline.ni.dhubhchoin@tg4.ie / 091 505050

An Foclóir Nua Béarla-Gaeilge iomlán ar fáil ar líne anois

Ag ócáid speisialta in Acadamh na hOllscolaíochta Gaeilge ar an gCeathrú Rua le déanaí d’fhógair Foras na Gaeilge go bhfuil an leagan críochnaithe den Fhoclóir Nua Béarla-Gaeilge (www.focloir.ie) ar fáil anois ar líne agus mar aip. I láthair ag an ócáid bhí Caitlín Nic Aoidh agus Mícheál Ó Ciaraidh ó TG4.

Tá OÉ Gaillimh páirteach in obair an Fhoclóra ó 2012, tráth ar chuir Aonad Aistriúcháin an Acadaimh beirt eagarthóirí ar fáil don tionscadal.

Tá méadú ó bhliain go bliain ar an líon daoine atá ag úsáid an Fhoclóra ar líne, agus in 2016 bhain www.focloir.ie líon 1.2 milliún úsáideoir uathúil amach. Tá 28% de na húsáideoirí sin thar lear.

Tá 3.5 milliún focal Béarla agus Gaeilge san Fhoclóir anois - méid atá níos mó ná formhór na bhfoclóirí móra dátheangacha atá ar fáil go hidirnáisiúnta.