Warning: Your browser doesn't support all of the features in this Web site. Please view our accessibility page for more details.

Mearchuardach [?]Cad seo?
Searches this and other areas of the Web site as you type. Results appear on this page.
Also searches the entire Web site (with results on a new page) if you press enter or click on 'Go'.

Diosca 1 - Rian 10: Bó na Leathadhairce le Bernie Ní Mhuircheartaigh agus Fergal Breathnach le Freda Nic Giolla Chatháin

Rugadh agus tógadh Bernie Ní Mhuircheartaigh, nó Bernie Pháid mar is fearr aithne uirthi, i gcúinne ceolmhar Chorca Dhuibhne. Spreagadh chun ceoil í ag aois an-óg toisc suim mhór a bheith ag a muintir i dtraidisiún na n-amhrán. B’amhránaí clúiteach sa dúiche é a hathair, Páid Pheats Phaid, agus is mó amhrán a dúirt sé féin agus Josie Pháidín, máthair Bernie, i bhfochair a chéile.

D’eisigh sí a dlúthdhiosca Spideoigín in 2003, tar éis di cúrsa sa cheol traidisiúnta a dhéanamh i gColáiste Bhaile Formaid. Tá cúpla rian ón dlúthdhiosca sin le cloisteáil ar a suíomh idirlín: www.myspace/berniephaid.com. Tá canta agus seinnte aici le mórchuid ceoltóirí clúiteacha, ina measc: Luka Bloom, Danielle Caruana, Steve Cooney, Eoin Duignan, Shane Howard, Liam Ó Maonlaí, Nábac, Mossie Ó Scanláin, Pauline Scanlon, Tony Small agus John Spillane.

Tá Bernie ag freastal ar an gcúrsa M.A. (Pleanáil Teanga) in Acadamh na hOllscolaíochta Gaeilge ar an gCeathrú Rua – cúrsa atá an-spreagúil agus suimiúil, dar léi. I dteannta Bhernie ar an rian seo, tá an cruitire cumasach Freda Nic Giolla Chatháin, atá le cloisteáil ar chúpla rian eile ar an dlúthdhiosca, agus an ceoltóir ildánach Fergal Breathnach. Is as Contae Mhaigh Eo d’Fhergal; seinneann sé an méarchlár chomh maith céanna leis an ngiotár agus tá suim agus scil faoi leith aige sa snagcheol agus i gceol blues. Tá máistreacht aige sa Cheol Pobail ó Ollscoil Luimnigh agus is ball é den ghrúpa Spáinneach/Gaelach Alalé, atá lonnaithe i nGaillimh – féach an suíomh idirlín http://alale.ie/ chun breis eolais a fháil orthu. Tá ceol Fhergal agus Bhernie le cloisteáil ar an dlúthdhiosca Spideoigín.

Is amhrán é seo a d’fhoghlaim Bernie sa bhunscoil agus a chantar i gCorca Dhuibhne. De réir Bhreandáin Uí Bheaglaoich, is ag cur síos ar dhéantús an bhraoinín bheannaithe atá an t-amhrán seo. Tá an file ag caoineadh a shlí beatha agus an cúpla punt a thuilleadh sé ar a cheird!

Bó na Leathadhairce

curfá
Bó, bó, bó na leathadhairce
Bó, bó, ’sí an tseanchaor adharcach
Bó, bó, bó na leathadhairce
Bó dhroimhionn dhearg is ní fheadair cá bhfaighinn í

Thíos cois na toinne ’sea beathaíodh mo chaora
Ag Diarmuid Ó Díoláin ó Bharra na hAoine
Mac dearthár athar dom a chuir le faill í
Easpa tobac a bhí ar an gcladhaire.

B’fhearr liom ná scilling go bhfeicfinn mo chaora
’Teacht go dtí an doras ar maidin nó istóiche
Thálfadh sí bainne orm, bheathódh sí uan dom
Chuirfeadh sí seaicéidín deas ar mo ghualainn.

Chonacsa beirithe í, chonacsa á roinnt í
Chuireas-sa dúil inti ach blaise ní bhfaighinn di
ó nár dheas í, ó nár mheidhreach
ó nár dheas í an tseanchaor adharcach.

Dá mbeinnse i rachmas, i ngradam is in oidhreacht
Thabharfainnse giní ar chúpla greim di
Ó nár dheas í, ó nár mheidhreach
Ó nár dheas í an tseanchaor adharcach.

D'íosfainn lán píce di, d'íosfainn lán oighinn di
D'íosfainn stráice den tseanchaor adharcach
Ó nár dheas í, ó nár mheidhreach
Ó nár dheas í an tseanchaor adharcach.

Acadamh na hOllscolaíochta Gaeilge, Ollscoil na hÉireann, Gaillimh T: + 353 (0)91 595101
Nuashonraíodh an leathanach seo 07 / 11 / 2009