Tá Muintir Uí Dhubhghaill ag canadh agus ag seinm ceoil ó bhíodar an-óg. Ar an rian seo tá Pádraig le cloisteáil ar an ngiotár, Máire Treasa ag canadh agus Mícheál ar an veidhlín.  Bhí Mícheál ag casadh an veidhlín leis an Galway Youth Orchestra ar feadh cúig bliana agus bhí sé mar bhall den cheolfhoireann nuair a bhuaigh siad Craobh na hÉireann. Chomh maith leis sin bronnadh an gradam don cheoltóir uirlise ab fhearr san fhéile air i rith an Wexford Opera Festival in 2001 agus 2008. Bhí sé ina bhall den ghrúpa ceoil Ceolan agus chas leo ar an dlúthdhiosca A Year, A Month and A Day. Le roinnt blianta anuas tá sé mar bhall den ghrúpa Kushla agus cloistear é ag casadh ceoil agus ag canadh i Luimneach leis féin nó in éineacht leis an ngrúpa cáiliúil Free Beer.

Seinneann Pádraig an giotár agus tá sé ag déanamh staidéir ar an gceol digiteach in Ollscoil Luimnigh faoi láthair.  Is amhránaí breá í Máire Treasa agus tá sí ag obair mar láithreoir le TG4. Bíonn sí féin agus a muintir cheolmhar le cloisteáil go minic agus iad ag casadh le chéile i dtithe ósta i gceantar Chois Fharraige. 

Chríochnaigh Máire Treasa an cúrsa Dioplóma sa Drámaíocht, a bhí á reáchtáil ag Acadamh na hOllscolaíochta Gaeilge ar an gCeathrú Rua.

Is amhrán álainn grá ó Chúige Uladh é Coinleach Glas an Fhómhair. Is ionann an leagan den amhrán atá le cloisteáil ar an dlúthdhiosca seo agus an leagan atá ag an ngrúpa Clannad.

• Séanadh
• Ráiteas Príobháideachta
• Cóipcheart
• Inrochtaineacht