Is as Gort an Choirce i dTír Chonaill do Lillis Ó Laoire – ’Tír na mBearád’, mar a thugann daoine áirithe ar cheantar Chloich Cheann Fhaola; tá sé ag baint faoi anois le seal in Eanach Dhúin, ar Achréidh na Gaillimhe – ceantar a bhfuil roinnt Gaeilge ann i gcónaí. D’fhoghlaim Lillis gach saghas amhráin ag éirí aníos dó, agus bhí gean ar leith aige ar amhráin Ghaeilge. Amach sna déaga a chuir sé suim i stór agus i stíl an tsean-nóis den chéad uair agus lean sé de ó shin. Bhuaigh Lillis Corn Uí Riada ag an Oireachtas faoi dhó, i 1991 agus i 1994. Rinne sé roinnt taifeadtaí in imeacht na mblianta chomh maith – ceann aonair Bláth Gach Géag dá dTig le Cló Iar-Chonnachta, agus ceann leis an gcomhlacht Breatnach Fflach dar teideal Datgan i bpáirt le hamhránaithe as na tíortha Ceilteacha eile . Foilsíodh é sin faoi cheadúnas sna Stáit Aontaithe faoin teideal Celtic Tales and Tongues agus is féidir é a íoslódáil ó iTunes! Ghlac Lillis páirt mar amhránaí sa chéad sraith den dráma teilifíse Battlestar Galactica faoi stiúir Bear McCreary, cumadóir ceoil na sraithe. "Siúlaigí a chairde" is teideal don amhrán agus d’aistrigh Lillis féin na focail go Gaeilge.

Tá taighde déanta ag Lillis ar an amhránaíocht i dToraigh i dTír Chonaill agus i gContae na Gaillimhe. Rinne sé scannán beathaisnéise den amhránaí Dara Bán Mac Donnchadha (1939-2008) sa bhliain 1998 i bpáirt le hAcadamh Ceoil agus Rince Ollscoil Luimnigh agus leis an chomhlacht JDM Productions, a bhfuil éileamh i gcónaí air.

Múineann Lillis cúrsaí ar an Bhéaloideas i Roinn na Gaeilge, i Scoil na dTeangacha, na Litríochtaí agus an Chultúir, in Ollscoil na hÉireann, Gaillimh, agus is é stiúrthóir acadúil an Dioplóma i Léann an Traidisiúin é, a ritear i gcomhpháirt idir Roinn na Gaeilge agus Acadamh na hOllscolaíochta Gaeilge, ar thrí láthair amach ó Phríomhchampas na hOllscoile – i nGaoth Dobhair, i gCarna agus sa Daingean. Beidh sé ag críochnú leabhair ar shaol agus ar shaothar Sheosaimh Uí Éanaí i bpáirt leis an Ollamh Sean Williams, as Evergreen State College, Olympia, Washington, le linn na bliana acadúla 2009-10, mar chuid de scéim taighde IRCHSS. Beidh láithreán gréasáin á thógáil mar chuimhneachán ar Sheosamh Ó hÉanaí chomh maith.

Le linn a óige, bhí Lillis go mór faoi thionchar an bhailitheora béaloidis Seán Ó hEochaidh as Teileann, i ndeisceart Thír Chonaill, a raibh cónaí air i nGort an Choirce. Suantraí atá san amhrán atá aige ar an rian seo − amhrán faoi bhean a tugadh as isteach i mbruíon na ndaoine maithe, ach a raibh súil aici go dtiocfadh a deirfiúr i gcabhair uirthi. Bhí an deirfiúr ag baint fraoigh faoin bhinn a raibh dún bhunadh na gcnoc ann agus rinne an bhean a fuadaíodh iarracht teachtaireacht a chur chuici faoi cheilt i bhfoirm amhráin. Is cosúil nár éirigh leis an deirfiúr an teachtaireacht a thuigbheáil. Ó Mháire Shéamuis, bean Uí Cheallaigh, as an Bhaile Mhór i dTeileann, a thóg Seán Ó hEochaidh an t-amhrán agus an scéal. D’fhoilsigh sé é ar an iris Béaloideas (XXIII), agus arís sa bhailiúchán cháiliúil Síscéalta Ó Thír Chonaill  (Baile Átha Cliath, 1977). Níl fonn ar bith luaite leis na focail seo i gceachtar den dá fhoilseachán. Chuir Lillis leagan den fhonn a bhí le ’Suantraí Hiúdaí’ leis, a chan Skara Brae, mar gur léir dó gur fhóir sé go maith do na véarsaí. Tá cosúlacht ag an fhonn seo le foinn atá ar shuantraithe eile fosta.

• Séanadh
• Ráiteas Príobháideachta
• Cóipcheart
• Inrochtaineacht