Is as an Aird Thiar i gCarna do Josie Sheáin Jeaic Mac Donncha. Bhí saibhreas an chultúir amhránaíochta ina thimpeall sa cheantar agus é ag éirí aníos agus go deimhin fuair sé oiliúint mhaith sa traidisiún sin ar leac an teallaigh, mar gur fonnadóir den scoth a bhí ina athair roimhe, Seán Jeaic Mac Donncha, a bhuaigh craobh an Oireachtais sa sean-nós sa bhliain 1943. Tá an chraobh chéanna buaite faoi thrí ag Josie - Corn Chomhlacht an Oideachais mar a thugtaí an uair sin air i 1971, agus Corn Uí Riada sna blianta 1978 agus 1982. Thosaigh Josie ag gabháil fhoinn go poiblí den chéad uair ag Feis Charna agus é ina dhéagóir agus ghlac sé páirt san Oireachtas den chéad uair agus é sna fichidí.

Tá aithne go forleathan ar Josie mar go n-eagraíonn sé imeachtaí ceoil agus amhránaíochta agus is maith uaidh iad a chur i láthair freisin mar fhear tí. D’eagraigh sé ceolchoirm mhór Chomóradh 10 mbliana Ionad an Acadaimh (Áras Shorcha Ní Ghuairim) i gCarna i Mí na Samhna na bliana 2008, agus bhí ealaíontóirí agus lucht freastail ó fhad is ó ghearr páirteach sa cheolchoirm chéanna. Chaith Josie bliain mar Amhránaí Cónaitheach Ionad an Léinn Éireannaigh, Ollscoil na hÉireann Gaillimh i 2003-04, agus mar chuid dá chuid oibre d’eagraigh sé ceardlanna amhránaíochta agus coirmeacha ceoil don uile aoisghrúpa.

Bhí lámh freisin ag Josie i mbunú Chumann Amhránaíochta Iorras Aithneach, seisiún amhránaíochta agus ceoil a reáchtáiltear ina cheantar dúchais ar an Satharn deireanach de gach mí. Deir sé gur ceann de na haidhmneanna móra atá ag an ócáid seo ná daoine nach dtéann ag comórtais a spreagadh le hamhráin a chasadh.

Tá turais tugtha ar Shasana ag Josie le Comhaltas Ceoltóirí Éireann agus ar Albain mar chuid de Chuairt na bhFilí, agus tá cuimhne ar leith aige ar an uair a chuaigh sé ar thuras go dtí an Libia, sa bhliain 1976, le Comhaltas Ceoltóirí Éireann.

Is iad an dá mhórthaifead a rinne Josie ná Josie Sheáin Jeaic (Cinq Planets, 2000) agus Ó na Sceirdí Aniar (Gael Linn, 1987) . Ghlac sé páirt freisin sa scannán ’The Irishmen – An Impression of Exile’ a rinneadh sna seascaidí agus sa tsraith ’Atlantean’ a stiúir Bob Quinn sna hochtóidí.

Is iascaire agus seoltóir é Josie agus tá sáreolas aige ar oileáin agus ar charraigeacha a cheantair dhúchais agus an seanchas a théann leo, mar a léirigh sé níos luaithe i mbliana nuair a roinn sé a chuid ama go fial le grúpa mac léinn san Acadamh a raibh tionscnamh á dhéanamh acu ar bhéaloideas an cheantair.

Táilliúir an Mhagaidh atá á chasadh ag Josie ar an taifead seo, amhrán taitneamhach i bhfoirm chomhrá idir an Táilliúir atá ag lorg mná agus an bhean a dhiúltaíonn dó. Deir Josie go bhfuil cúpla véarsa sa leagan seo nach gcloistear ag fonnadóirí ach go hannamh, agus gurbh óna athair féin a chuala sé iad, is iad sin véarsaí a trí agus a seacht.

• Séanadh
• Ráiteas Príobháideachta
• Cóipcheart
• Inrochtaineacht