Mick Moylette, Patrick & Tomás Connolly 

Árainn

Amuigh i gCuan na Gaillimhe faoi scamall gorm glas ón spéir,
Tá oileán aoibhinn álainn ag lonradh faoin ngréin.
Bíonn íseal agus uasal ag teacht ann ar cuairt gach lá,
Ag féachaint ar na hiontaisí is ag titim linn i ngrá.

Seo dhuit mo chomhairle anois, buail do mhála ar do dhroim,
Tóg an bád go hÁrainn amuigh ansiúd i Ros an Mhíl.
Bain lán do shúl as na radharcanna is ná titeadh ort aon néal;
Mar tá áilleacht mhór le feiceáil agat sul má bhuaileann tú le céibh.

Curfá
Ó oileáinín beag mara ar nós carraig lom ina suí
Ó oileáinín beag mara a chuirfeadh ríméad ar do chroí.

Tá an mapa i do láimh agat is níl baol go ngabhfadh tú amú.
Tabhair d’aghaidh ar an Dún Aengus an áit a bhfuil air cáil is clú,
Na teampaill is na clochair is na pabhsae fiáine ag fás,
Na rónta sna cuanta, na tránna geala bán(a).

A stór, ná cuimhnigh imeacht uaim, níor éirigh an ghealach fós,
Mar sin é an uair is fearr muid, céard faoin spraoi is an spórt?
Comhluadar deas macánta a fhágann tú faoi chineál draíocht,
Is níl aon leigheas i ndán dhuit nó go bhfillfidh tú arís.

Curfá
Ó oileáinín beag mara ar nós carraig lom ina suí
Ó oileáinín beag mara a chuirfeadh ríméad ar do chroí. (x 3)