Diosca 1  - Rian 6: S Ambó Éara le Áine Ní Dhroighneáin

Is as Baile an tSléibhe sa Spidéal í Áine Ní Dhroighneáin agus tá sí ag amhránaíocht ó bhí sí ina cailín beag. Thosaigh sí ranganna sean-nóis leis an nGaelacadamh agus í ocht mbliana d’aois agus bhuaigh sí an Corn Faoi 18 ag an Oireachtas nuair a bhí sí cúig bliana déag.  Fuair sí an dara háit i gCorn Mháire Mhic Dhonnchadha agus i bhFéile na Mí sa bhliain 2002.

Bhí tionchar ag lear mór amhránaithe sean-nóis ar Áine, ina measc Patsy Ó Ceannabháin, Máire Phíotair Uí Dhroighneáin, Pat Phádraig Tom Ó Conghaile agus Johnny Mháirtín Learaí.

Bhí sí ag gabháil fhoinn do Mary Robinson, nuair a thug sí cuairt ar an Spidéal le linn a hUachtaránachta di, agus chas sí ag an bhFéile Cheilteach in Lorient faoi dhó. Bhí sí le cloisteáil ar chláir ar TG4 − cláir mar Abair Amhrán agus clár faisnéise faoin Dr Eithne Mhic Aoidh, Dochtúir na nDaoine. Is aisteoir lánaimseartha í agus is í a dhéanann páirt an dlíodóra, Tara, ar an sobalchlár Gaeilge, Ros na Rún.