Diosca 1  - Rian 7:  Caoineadh Nain - Johnny Óg Connolly le Charlie Lennon

Is as Cor na Rón, Indreabhán, Co. na Gaillimhe don bhoscadóir cumasach, Johnny Óg Connolly. Is óna athair, Johnny Connolly, agus a chomharsa, Micheal C. Ó Coisdealbha, a d’fhoghlaim sé a chuid ceoil. Is iomaí duais atá buaite aige: tháinig sé sa chéad áit sa chomórtas faoi 12 ag Fleadh Cheoil na hÉireann agus bronnadh bonn náisiúnta air i gcomórtas Slógadh. Chaith sé ocht mbliana ina bhall den ghrúpa Na hAncairí in éindí le John Beag Ó Flatharta agus chaith sé seal ag casadh le banna ceoil Sheáin Keane. Thaistil sé ar fud na hEorpa, Mheiriceá, na hAstráile agus na Nua-Shéalainne. 

D’eisigh sé a chéad dlúthdhiosca, Dreaming Up The Tunes, i gcomhar le Brian McGrath ar lipéad Chló Iar-Chonnachta sa bhliain 1998 agus in 2003 d’eisigh sé féin agus a dhlúthchara agus comrádaí ceoil, Charlie Lennon, an dlúthdhiosca Dusk till Dawn. Tá sé i mbun oibre faoi láthair ar shaothar nua ceoil.

Rugadh an cumadóir agus an ceoltóir, Charlie Lennon, i gCoillte Clochair, Co. Liatroma − ceann de na toibreacha ceoil thraidisiúnta is saibhre sa tír. Thosaigh sé ag foghlaim an phianó agus na fidile nuair a bhí sé seacht mbliana d’aois agus ina dhiaidh sin rinne sé staidéar ar an veidhlín clasaiceach agus ar armóiní snagcheoil. Chaith sé cuid dá shaol i Sasana, áit ar bhain sé céim dhochtúireachta amach san fhisic núicléach in Ollscoil Learphoill. 

Bhí sé ina bhall de bhanna céilí iomráiteach The Liverpool Céilí Band, a bhuaigh Craobh na hÉireann faoi dhó agus é ag casadh leo. Is iomaí ceoltóir a ndearna sé taifead leo: Joe Burke, Séamus Connolly, Matt Molloy, Seán Johnny agus Johnny Óg Connolly agus mórán eile nach iad.