Na Poirt

Bhí Miss McLeod thuas ar bhord ’s í ag damhsa ríl ar phláta
’S a Chríost na nGrást, nach mb’álainn í is a sciorta léi go sála.
Bhí an Colúr ar an nGeata amuigh agus píoblach air a’ casadh
’S cé nach raibh aon locht ar a phort, ní raibh duine ar bith ag damhsa.

Ach na Gairdíní Saileacha a bhí ar chúl an tí, bhioraigh a gcuid cluasa
’S go mall righin réidh fuair siad faoi réir agus thosaíodar ag luascadh.
Anonn ’s anall, mar bheadh síogaí in áth, in uaithne a bhíodar gléasta
Radharc ní b’fhearr ní bhfaighfeá abhus ná thall ag bainis ná ag féasta.

Bhí Boicíní Óráin Mhóir ag teacht abhaile ó chéilí;
A gcuid boscaí ceoil ina ngabhail, bhí deichniúr acu in éindí.
Cé a thiocfadh ina dtreo ach Seán sa gCeo agus sheas sé ansiúd le balla
’S lena shála aniar, ó ’s ba shlachtmhar iad, bhí Gearrchailí Chaisleán an Bharraigh.

Bhuel, isteach leis an gcrowd tigh Miss McLeod,
Sin é an áit a raibh an pléaráca.
Bhí Fear Chonnachta ar an Ramble ann ’s an Rógaire Dubh ’s é leathdhallta
’S ar an lota thuas ’s é ag dearcadh anuas bhí an Páistín Fionn ’s é ag caoineadh.

Bhí Drowsy Maggie sa gcisteanach ar Mhála Fataí suite
Agus Rakish Paddy a’ spochadh aisti ag iarraidh í a mhealladh chuige!
Bhí Buachaillí na Locha ansiúd agus go deimhin bhíodar múinte
’S bhí Géabha an Phortaigh ag grágaíl taobh amuigh den doras dúnta.

Bhí an Braon Crua á roinnt go fóill, ó ba mhilis é is ba bhlasta
’S ní raibh ríl ná jig na hornpipe nach raibh an oíche úd casta.
Ach sin é an uair ar fhág mise iad ’s an slua ag gabháil thrína chéile;
Bhí an Sioc Uilig Thart nuair a bhog mé amach ’s thug mé m’aghaidh ar Bhóthar an tSléibhe.