View in English   Leagan Téacs  Zúmáil (-) (+)   Amharc ( Normálta Ardchodarsnacht ) Priontáil  A go Z  Léarscáil an tSuímh

Diosca 2  - Rian 5: Sleamhnáin John Murphy/Maurice Manley/ John Kelly le Breanndán Ó Beaglaoich

Tá cáil an cheoil rince, an fhoinn mhall, agus na n-amhrán ar an mBeaglaoich óg.  Is é Breanndán an té is óige de naonúr − duine de chlann cheolmhar Bheaglaoich ó Bhaile na bPoc in Iarthar Dhuibhneach, Co. Chiarraí. Tá ainm na clainne agus a gclann siúd in airde ó thaobh ceoil agus amhrán. Thug Breanndán an ceol leis ar dtús ar leic an teallaigh óna thuismitheoirí. D’fhoghlaim sé a thuilleadh de cheol na háite óna chomharsana:  Seán Ó Cochláin, Dálaí, Moss Martin, Muiris Ó Cuinn, Tomás Groiméil, Johnny Ghabha, Páid Ó Gairbhí. Sna hochtóidí, cuir sé spéis mhór i gceol Johnny O’Leary − duine de mhórcheoltóirí Shliabh Luachra, a cailleadh in 2004. Tháinig an chéad cheirnín aonair ó Bhreanndán, Seana Choirce, le Gael-Linn amach i 1987; Johnny O’Leary a scríobh an nóta brollaigh. D’eisigh sé an  dlúthdhiosca, We Won’t Go Home ’Til Morning ar lipéad Kells i 1997 agus ceann eile, Oíche Go Maidean, in 2003.

Tá ceol dúchasach Chorca Dhuibhne curtha os comhair an tsaoil mhóir aige. Poirt agus foinn áitiúla ar nós Beauty Deas an Oileáin ón mBlascaod Mór.  Thaistil sé ar fud Mheiriceá leis an ngrúpa ceoil, The Boys of the Lough. Is ball é den ghrúpa Beginish chomh maith. Bhí sé ar an gcéad turas de chuid cheol traidisiúnta na hÉireann chun na hEastóine sa bhliain 1988.

Aithnítear Breanndán mar scéalaí oilte agus mar rinceoir chomh maith − is greanta mar a rinceann sé seiteanna ó réigiúin éagsúla na tíre. Siar amach san oíche, ó am go chéile, feictear ag seinm mileoidin é agus ag bualadh steip − an dá rud i dteannta! Bíonn sé le feiscint ag láithriú cláracha ceoil ar TG4 ó am go chéile. Duine d’ambasadóirí cultúir na hÉireann is ea é. Tá siúl déanta ar fud na cruinne aige féin, a bhosca ceoil agus Beauty Deas an Oileáin.

D’fhoghlaim Breanndán an chéad sleamhnán ón gceoltóir iomráiteach ar an orgán béil, John Murphy ó Carrick on Bannow i gCo. Loch Garman. Tháinig an dara ceann ó Julia Clifford agus is in onóir an tseanchaí Éamon Kelly, a fuair bás i mí Dheireadh Fómhair ’01, atá an tríú ceann mar is ar chlár teilífíse dá chuid a chuala Breanndán den chéad uair é. John Kelly a bhí á sheinm ar an gconsairtín agus thugadh seisean Tim Griffin’s Jig air. Cairdín dhá shraith C#D atá le cloisteáil ar an rian seo.

Tá Breanndán i mbun staidéir faoi láthair ar an gcúrsa Dioplóma sna Dána (Léann an Traidisiúin) atá á reáchtáil ag Acadamh na hOllscolaíochta Gaeilge sa Daingean, Co. Chiarraí.

 

• Séanadh
• Ráiteas Príobháideachta
• Cóipcheart
• Inrochtaineacht