December Straitéis Acadúil á Seoladh ag Ollscoil na Gaillimhe

Sheol Cathaoirleach Choiste an Oireachtais ar Oideachas, Breisoideachas agus Ardoideachas, Taighde, Nuálaíocht agus Eolaíocht, Paul Kehoe T.D., Straitéis Acadúil Ollscoil na Gaillimhe (2021-26) go hoifigiúil inniu. 

Cuireadh an Straitéis Acadúil i dtoll a chéile ar dtús i gcaitheamh na bliana 2020-21, tráth a raibh an phaindéim ann ar fud an domhain, agus tréimhsí ama nuair a bhí srianta sláinte poiblí i bhfeidhm. Leagtar amach inti fealsúnacht na hOllscoile i leith an teagaisc agus na foghlama, agus na céimeanna atá le glacadh le go gcuirfear le heispéireas foghlama na mac léinn sa todhchaí. 

Seo mar a labhair Cathaoirleach Choiste an Oireachtais, Paul Kehoe, T.D.: “Tá an-áthas orm Straitéis Acadúil na hOllscoile a sheoladh. Léirítear inti an chaoi ar féidir le hollscoil glacadh le cur chuige i leith an teagaisc agus na foghlama a dhéanann mic léinn agus comhaltaí foirne a chumasú agus a chumhachtú. Guím gach rath ar an Ollscoil agus tacaíocht a fháil aici ón straitéis chun cur le rannpháirtíocht, cuimsitheacht agus le gnóthachtáil.”

Bhí an méid seo a leanas le rá ag Uachtarán Ollscoil na Gaillimhe, an tOllamh Ciarán Ó hÓgartaigh: “Tá creideamh daingean againn in Ollscoil na Gaillimhe asainn féin mar institiúid léinn – dár mic léinn agus dár gcomhaltaí foirne. Thug ár ngníomhartha i rith na paindéime le fios an tiomantas diongbháilte a bhí againn don misean sin, in ainneoin na ndúshlán ar fad. Táimid ag féachaint chun cinn anois, agus úsáid á baint againn as an eolas atá sealbhaithe againn, agus an taithí a bhí againn, chun cíoradh a dhéanamh ar an gcaoi ar féidir le cuir chuige éagsúla i leith an teagaisc deiseanna nua a thabhairt dúinn chun ár luachanna, mar atá meas, oscailteacht, barr feabhais agus inbhuanaitheacht, a leabú in eispéireas foghlama ár gcuid mac léinn.”

Díríonn Straitéis Acadúil na hOllscoile ar chúig réimse tosaíochta straitéisí: Ár gCultúr Foghlama; Ár bhFoireann a Fhorbairt agus a Chumhachtú; Ár dTimpeallacht Teagaisc agus Foghlama; Ár bPobal Féin agus Lasmuigh de; agus Cultúr Feabhsaithe Cáilíochta.

Tá líon forbairtí beartaithe i rith an phlean cúig bliana, agus áirítear leo: 

Teicneolaithe Foghlama a cheapadh le go gcuirfear feabhas ar ár dtimpeallacht dhigiteach teagaisc agus foghlama, mar aon leis an gcéad Oifigeach Sláine Acadúla a cheapadh

Moltaí le forbairt le go gcuirfear lenár dtimpeallacht dhigiteach teagaisc agus foghlama ar champas chathair na Gaillimhe, a dtugaimid an tIonad Foghlama/Leabharlann air.

Maoiniú a fháil ón gCiste Fóraim Náisiúnta – Ailíniú Straitéiseach ar Fheabhas Teagaisc agus Foghlama le go dtacófar leis an teagasc agus leis an bhfoghlaim.

Tá ár léachtóirí tiomanta úsáid a bhaint sa todhchaí as na gnéithe is fearr den chianfhoghlaim, agus cuirfidh an chianfhoghlaim leis an teagasc ar an láthair, seachas dul ina áit.

Timpeallacht agus éiteas a thógáil a chuireann ar chumas agus a thugann cumhacht dár gcuid mac léinn agus dár bhfoireann dul i mbun fiosrúchán criticiúil, cleachtas machnamhach, agus forbairt ghairmiúil, agus a chothaíonn iontas agus paisean iontu dá ndisciplíní agus dá réimsí spéise.

Bhí an méid seo le rá ag an Uachtarán Ionaid agus Meabhránaí Ollscoil na Gaillimhe, an tOllamh Pól Ó Dochartaigh: “Táimid go mór faoi chomaoin ag ár bhfoireann Ollscoile a d’fhorbair modhanna nua teagaisc i rith na paindéime, agus a ghlac chucu féin iad. D’éirigh leo freisin teacht ar bhealaí a lig dúinn cuid de na tairbhí sin a choinneáil, agus ar an gcaoi sin cur lena bhfuil ar siúl againn le fada an lá sna seomraí ranga, sna saotharlanna agus i halla léachtaí. 

“Dearadh ár Straitéis Acadúil go sonrach le go mbeadh níos mó ná teagasc, foghlaim agus measúnú i gceist léi. Táimid ag caitheamh leis seo mar dheis chun tacú leis an nuálaíocht i dteagasc agus foghlaim, agus glacadh le cur chuige níos nua-aimseartha chun tacú lenár mic léinn, agus an seans is fearr a thabhairt dóibh oideachas maith a fháil, agus a bheith in ann smaoineamh go criticiúil. Fágfaidh sé sin ar fad go mbeidh siad ullmhaithe ról lárnach a ghlacadh sa tsochaí i gcaitheamh a saoil.”

Is féidir Straitéis Acadúil Ollscoil na Gaillimhe a fháil anseo Straitéis Acadúil - Teagasc agus Foghlaim - Ollscoil na Gaillimhe

Críoch